Historiak dokumentatzeko artea
Duela mende bat baino gehiagotik, zinema gizateriaren entretenimendu handienetakoa bihurtu da. Gizarte gutxik, bat berak ere ez esatearren, eman diote bizkarra zazpigarren arteari, eta gaur egun bizi dugun egoerari esker planetako edozein txokotako filmez goza dezakegu. Zinemak entretenitzeko balio du, baina baita gurea ez den beste errealitate batzuk erakusteko ere. Izan ere, abangoardia honen lehenengo urratsek garrantzi dokumentalista sakona dute.
1895eko abenduaren 28an, Lumière anaien lehenengo zinema-emanaldiaren lekuko izan zen Paris, hau da, asmakizun berri haren guraso ezagunen lehendabiziko emanaldiarena. Publikoak ikusi zituen lehen irudiak fabrikatik irteten ari ziren langile talde batenak izan ziren, eta tren-geltoki bateko jendearen gorabeherak. Zinema gizakiaren egunerokotasuna dokumentatuz sortu zen, eta 100 urte luze geroago, badira bide horietatik jarraitzen dutenak.
102 urteko aldea dago Euskal Zinema Dokumentalaren hamargarren Astearen eta Nanook, el esquimal filmaren estreinaldiaren artean, genero horren historiako lehen film luzetzat jotzen dena. Urte asko igaro dira, baina sortzaileek oraindik ere benetako ikuspegiak, historiak eta pertsonaiak gorde nahi dituzte, tarteko inolako fikziorik gabe. Eta deigarria da, hain txikia den gure lur honetan, urtez urte, dozenaka proiektu estreinatzea. Batzuk beste batzuk baino oharkabeagoan pasatzen dira, baina, zalantza barik, euskal zinema dokumentalak sormen-une egokia bizi du.
ZINEMASTEAren azken edizioan minutu batzuk lapurtu genizkien euren lana aurkeztera etorri ziren pertsona guztiei. Kameren aurrean eserarazi eta hitz egitera gonbidatu genituen. Solasaldi horien emaitza artikulu honetan aurkezten ari garen film laburrean ikus daiteke. Minutu batzuk zinema dokumentalaren omenez, inspiratzen gaituen eta mundua anitza eta zirraragarria dela erakusten digun generoaren omenez. Historia inspiratzaileak hurbiltzen dizkigun eta gure inguruan gertatzen diren bidegabekeriei ahotsa jartzen dien zinema.
Ondo pasa film laburra ikusten 😉